लातूरमध्ये सोयाबीन उत्पादक शेतकऱ्यांची 85 लाखाची फसवणूक

सोयाबीनचे कोठार असलेल्या लातूर येथे जास्तीच्या दराने सोयाबीन खरेदीचे आमिष दाखवून 37 शेतकऱ्यांची 85 लाख रुपयांची फसवणूक झाल्याचा प्रकार उघडकीस आला असून, या प्रकरणी एका कंपनीतील तिघा विरुद्ध पोलिसात गुन्हा दाखल झाला आहे. दरम्यान, बियाणे विकणाऱ्या 2 दुकानदारांनाही यांनी गंडा घातला आहे.

महत्त्वाची बातमी : 1 सप्टेंबरपासून दूध महागणार

लातूर जिल्ह्यात बहुतांश शेतकरी सोयाबीनचे उत्पादन घेतात. त्यामुळे लातूरला सोयाबीनचे कोठार मानले जाते. त्यामुळे लातूर बाजारपेठेत सोयाबीनचे दर ठरतात. मात्र गेल्या काही दिवसात सोयाबीनचे दर घसरत आहेत. याचाच फायदा घेऊन येथील शेतकऱ्यांना वाढीव दरात सोयाबीनची खरेदी करण्याचे आमिष दाखवत गोल्डस्टार ग्रो इंडिया लिमिटेड कंपनीने एकूण 37 शेतकऱ्यांची तब्बल 85 लाख 15 हजार 345 रुपयांची फसवणूक केली आहे. तर, दोन बियाणे विक्री करणाऱ्या दुकानदारांना सोयाबीन बियाणे उपलब्ध करून देतो म्हणून त्यांच्याकडून आगावू पैसे घेऊन त्यांनाही गंडा घातल्याचा प्रकार समोर आला आहे. या प्रकरणी लातूर एमआयडीसी पोलीस ठाण्यात ‘गोल्डस्टार ग्रो इंडिया लिमिटेड कंपनी’ व कंपनीच्या एका महिलेसह तिघांवर फसवणुकीचा गुन्हा दाखल करण्यात आला आहे. शेतकऱ्यांची फसवणूक करणारे तिघेही हे फरार झाले आहेत.

सोयाबीनचे भाव घसले असले तरी लातूर एमआयडीसीतील गोल्डस्टार ग्रो इंडिया लिमिटेड ही कंपनी शेतकऱ्यांना रास्त भाव देत असल्याची माहिती मोटेगाव (ता. रेणापूर) येथील सोयाबीन उत्पादक शेतकरी जगदीश नरहरी सोमवंशी यांना मिळाली. याबाबत त्यांनी कंपनीशी संपर्क केल्यानंतर कंपनीतील अतिक युसुफ शेख, कल्पना सांगवीकर व यशवंत नाडे हे त्यांच्या मोटेगाव येथे आले. गावात येऊन त्यांनी जगदीश सोमवंशी यांचे 2 लाख 55 हजार 489 रुपये किमतीचे तर श्रीधर जाधव यांचे 3 लाख 87 हजार 343 रुपये किमतीचे सोयाबीन घेऊन या दोघांना त्यांनी आयसीआयसीआय बँकचे धनादेशही दिले. मात्र, त्यांना पैसे मिळाले नाहीत.

हे नक्की वाचा : शेतकरी आत्महत्येचा मुद्दा मला अस्वस्थ करतो : शरद पवार

त्यांनी कंपनीशी तसेच संबंधित तिघांशी संपर्क साधण्याचा प्रयत्न केला. पण ती कंपनी बंद होती. तिघेही फरार झाले होते. आपल्यासारखीच इतर शेतकऱ्यांची आणि दोन बियाणे विक्रेत्या दुकानदारांची फसवणूक झाल्याचे त्यांच्या लक्षात आले. त्यानंतर त्यांनी लातूर येथील एमआयडीसी पोलीस ठाण्यात सदर कंपनी आणि तिघांविरोधात तक्रार दाखल केली. या प्रकरणी पोलीस उप निरीक्षक डाके अधिक तपास करीत आहेत.