देशातील 11 व्या कृषी गणनेला प्रारंभ

देशातील 11 व्या कृषी गणनेचा प्रारंभ करण्यात आला असून, यदा डेटा संकलनासाठी प्रथमच स्मार्ट फोन आणि टॅबलेटचा वापर होणार आहे. केंद्रीय कृषी आणि शेतकरी कल्याण मंत्री नरेंद्र सिंह तोमर यांच्या उपस्थितीत कृषी गणनेचा प्रारंभ करण्यात आला.

भारतासारख्या विशाल आणि कृषीप्रधान देशात या गणनेमुळे मोठा फायदा होणार असल्याचे मत व्यक्त करून. कृषीमंत्री नरेंद्र सिंह तोमर म्हणाले, पंतप्रधान नरेंद्र मोदी यांच्या नेतृत्वाखाली शेतकऱ्यांचे उत्पन्न वाढवण्यावर भर दिला जात आहे. त्यांच्या राहणीमानात परिवर्तन घडवण्याबरोबरच लहान शेतकऱ्यांच्या सक्षमीकरणासाठी त्यांना संघटित करणे. तसेच त्यांना फायदेशीर पिकांकडे आकर्षित करणे आणि जागतिक मानकांच्या बरोबरीने उत्पादनाची गुणवत्ता सुनिश्चित करणे आवश्यक असल्याचे तोमर यांनी यावेळी सांगितले.

महत्त्वाची बातमी : शेततळे, सूक्ष्म सिंचनासाठी 126 कोटी रुपयांचा निधी

पंतप्रधान नरेंद्र मोदींनी उचललेल्या ठोस पावलांचे फळ कृषी क्षेत्राला मिळत असल्याचे सांगून, तोमर म्हणाले, देश वेगाने डिजिटल शेतीकडे वाटचाल करत आहे. या गणनेत तंत्रज्ञानाचा पुरेपूर वापर करण्याची हीच वेळ आहे. कृषी गणनेचा व्यापक दृष्टिकोनातून विचार व्हायला हवा, कृषी गणनेमुळे पिकांच्या मॅपिंगमध्येही योगदान मिळू शकते, जेणेकरून देशाला त्याचे फायदे मिळतील. तोमर यांनी केंद्रीय विभाग, राज्य सरकारे आणि संबंधित संस्थांना ही गणना पूर्ण निष्ठेनेने पार पाडावी असे आवाहन केले.

दरम्यान, यावेळी तोमर यांच्या हस्ते राज्ये, केंद्रशासित प्रदेशांच्या वापरासाठी गणनेच्या कार्यान्वयन मार्गदर्शक तत्वांच्या पुस्तिकेचे प्रकाशन करण्यात आले. तसेच डेटा संकलन पोर्टल, अ‍ॅप देखील सुरु करण्यात आले.

मोठी बातमी : नियमित कर्ज भरणाऱ्या शेतकऱ्यांना ५० हजार रुपये : एकनाथ शिंदेंचा निर्णय

कृषी गणना दर पाच वर्षांनी केली जाते. कोरोना महामारीमुळं विलंबानंतर ही गणना आता हाती घेतली जात आहे. कृषी जनगणनेचे प्रत्यक्ष कार्य ऑगस्ट 2022 मध्ये सुरु होईल. कृषी जनगणना हा तुलनेने सूक्ष्म पातळीवर विविध कृषी मापदंडांवर माहितीचा मुख्य स्त्रोत आहे. कृषी गणनेसाठी प्रथमच डेटा संकलन स्मार्ट फोन आणि टॅब्लेटवर केले जाईल. जेणेकरुन डेटा वेळेत उपलब्ध होईल.

बहुतेक राज्यांनी त्यांच्या जमिनीच्या नोंदी आणि सर्वेक्षणांचे डिजिटायझेशन केले आहे. ज्यामुळे कृषी गणनेच्या डेटाच्या संकलनाला गती मिळेल. डिजिटलाइज्ड भूमी अभिलेखांचा वापर आणि डेटा संकलनासाठी मोबाइल अॅप्सचा वापर देशातील ऑपरेशनल होल्डिंग डेटाबेस तयार करण्यास सक्षम करेल. तांत्रिक सत्रादरम्यान, कृषी गणना अंमलबजावणी प्रक्रिया आणि वेब पोर्टल आणि मोबाइल अॅपची ठळक वैशिष्ट्ये प्रदर्शित करण्यात आली आहे.