पंतप्रधान किसान सन्मान योजनेबरोबरच शेतकऱ्यांना मिळणार नवीन दोन योजनांचा लाभ

पंतप्रधान किसान सन्मान योजनेचा लाभ घेणाऱ्यां शेतकऱ्यांना आता किसान क्रेडिट कार्ड आणि पंतप्रधान मानधन योजना या दोन नवीन योजनांचा लाभ घेता येणार आहे. दरम्यान, केंद्र सरकारकडून एप्रिल महिन्याच्या 10 तारखेच्या सुमारास पंतप्रधान किसान सन्मान योजनेचा आठव्या हप्त्याची रक्कम शेतकऱ्यांच्या खात्यात जामा करण्याच्या तयारीत असल्याची माहिती आहे.

पंतप्रधान किसान सन्मान योजना आणि किसान क्रेडिट कार्ड लिंक करण्यात आले आहे. नुकताच 24 फेब्रुवारी 2019 रोजी हा निर्णय घेण्यात आला आहे. केंद्रातील मोदी सरकारने शेतकऱ्यांना कर्ज उपलब्ध व्हावे म्हणून किसान क्रेडिट कार्डद्वारे कर्जाची प्रक्रिया सोपी केली आहे. किसान क्रेडिट कार्ड घेण्यासाठी बँकांची फी रद्द करण्यात आली आहे. क्रेडिट कार्डला पंतप्रधान किसान निधीला जोडण्यात आले आहे. शेतकऱ्यांना बिनव्याजी एक लाख रुपयांपर्यंतचे कर्ज देण्यात येणार असून, वर्षभरात त्याची परतफेड करावी लागणार आहे. किसान क्रेडिट कार्डद्वारे शेतकऱ्यांना 3 लाख रुपयांपर्यंतचे कर्ज 9 टक्के व्याजाने मिळते. केंद्र सरकार यावर 2 टक्के सूट देते. वेळेत कर्ज फेड केल्यास 3 टक्के आणखी सूट मिळते. शेतकऱ्यांना या प्रकारे किसान क्रेडिट कार्डद्वारे 4 टक्के व्याजदरानं कर्ज मिळणार आहे.

पंतप्रधान किसान सन्मान योजनेचा लाभ घेणाऱ्या शेतकऱ्यांना पंतप्रधान किसान मानधन योजनेचा लाभ घेता येतो. केंद्र सरकारकडे शेतकऱ्यांची सर्व माहिती असल्याने शेतकऱ्यांना वेगळी कागदपत्रं जमा करावी लागत नाहीत. किसान सन्मान योजनेच्या मिळणाऱ्या 6 हजार रुपयांमधून किसान मानधन योजनेचा हप्ता कापला जातो. ही प्रक्रिया सुरु राहिल्यास शेतकरी पेन्शन योजनेचाही लाभ घेऊ शकतात.

पंतप्रधान शेतकरी सन्मान निधी योजनेंतर्गत शेतकऱ्यांना सातव्या हप्त्याची रक्कम 25 डिसेंबर 2020 पासून मिळण्यास सुरुवात झाली. प्रत्येक वर्षाला शेतकऱ्यांच्या खात्यात एकूण तीन हप्त्यांमध्ये 6000 रुपये जमा केले जातात. आतापर्यंत 9 कोटी 41 लाख शेतकऱ्यांना सातवा हप्ता मिळाला आहे. या योजनेमध्ये पहिला हप्ता हा 1 डिसेंबर 31 ते मार्च या कालावधीत दिला जातो. तर दुसरा हप्ता 1 एप्रिल ते 31 जुलैपर्यंत दिला जातो. शेतकऱ्यांना खात्यात तिसऱ्या हप्त्याचा लाभ 1 ऑगस्ट ते 30 नोव्हेंबर या कालावधीत मिळतो. आता केंद्र सरकारकडून एप्रिल महिन्याच्या 10 तारखेच्या सुमारास पंतप्रधान किसान सन्मान योजनेचा आठव्या हप्त्याची रक्कम शेतकऱ्यांच्या खात्यात जामा करण्याच्या तयारीत असल्याची माहिती आहे.