Kisan Morcha : शेती प्रश्नासाठी आता सर्व शेतकरी संघटना एकत्र : महाराष्ट्रात संयुक्त किसान मोर्चाची स्थापन होणार !

Agriculture News : राज्यातील शेतकऱ्यांच्या विविध प्रश्नांवर प्रभावी संघर्ष करण्यासाठी आता राज्यातील बहुतांश सर्वच्या सर्व शेतकरी संघटना संयुक्त किसान मोर्चाच्या छत्राखाली एकत्र येण्याचे शक्यता निर्माण झाली आहे. नुकतीच मुंबई येथे राज्यातील बहुतांश सर्वच संघटनेच्या प्रतिनिधींची एक बैठक झाली असून, त्यामध्ये विविध प्रश्नांवर चर्चा करण्यात आली आहे.

मोठी बातमी : 1 रुपयात पीक विमा : वेबसाईट हँग

मुंबई येथील शेतकरी कामगार पक्षाच्या कार्यालयात झालेल्या या बैठकीत विविध महत्त्वपूर्ण निर्णय घेण्यात आले आहेत. दिल्लीच्या ऐतिहासिक शेतकरी आंदोलनात आणि महाराष्ट्रातील अभूतपूर्व शेतकरी संपात सहभागी असलेल्या बहुतेक संघटनांचे प्रतिनिधी या बैठकीला उपस्थित होते.

या संदर्भात बोलताना अखिल भारतीय किसान सभेचे राष्ट्रीय अध्यक्ष डॉ. अशोक ढवळे म्हणाले, राज्यात संयुक्त किसान मोर्चा आता शेतकरी प्रश्नांवर प्रभावी संयुक्त संघर्ष उभारणार आहे. 31 ऑगस्ट रोजी संयुक्त किसान मोर्चाची स्थापना मुंबई येथे तीन हजार प्रमुख शेतकरी कार्यकर्त्यांच्या उपस्थितीत करण्यात येणार आहे.

सर्व शेतकऱ्यांना उत्पादन खर्चाच्या दीडपट हमी भाव, शेतकरी – शेतमजुरांची संपूर्ण कर्जमुक्ती व त्यांना किमान पाच हजार रुपये दरमहा नियमित पेन्शन, नैसर्गिक आपत्तींचा सामना करण्यासाठी सर्वंकष पीक विमा योजना, अशा राष्ट्रीय प्रश्नांव्यतिरिक्त राज्यस्तरीय प्रश्नांवरसुद्धा संघर्षाचा ठराव केले जाणार आहेत.

मोठी बातमी : बोगस बियाणांचे नवे संकट ; 1 हजार 85 तक्रारी दाखल

महाराष्ट्रात स्थापन करण्यात येणाऱ्या या संयुक्त किसान मोर्चासाठी (Samyukt Kisan Morcha) राज्यातील 11 प्रमुख संघटनांची राज्यस्तरावरील समन्वय समिती निवडण्यात आली. या राज्य परिषदेचा ठराव व मागण्या तयार करण्याची जबाबदारी प्रा. एस. व्ही. जाधव, प्रताप होगाडे, प्रतिभा शिंदे, डॉ. अजित नवले, राजन क्षीरसागर, उल्का महाजन, किशोर ढमाले, युवराज गटकळ, सुभाष काकुस्ते आणि सीमा कुलकर्णी यांच्या समितीला देण्यात आली आहे.

मुंबईत झालेल्या या बैठकीत शेतकरी सभेचे आमदार जयंत पाटील, प्रा. एस. व्ही. जाधव, ॲड. राजेंद्र कोरडे व बोऱ्हाडे पाटील, अखिल भारतीय किसान सभेचे उमेश देशमुख, डॉ. उदय नारकर, किसन गुजर व डॉ. भाऊसाहेब झिरपे, महाराष्ट्र राज्य किसान सभेचे राजन क्षीरसागर, ॲड. बन्सी सातपुते व अशोक सोनारकर, लोक संघर्ष मोर्चाच्या प्रतिभा शिंदे, सर्वहारा जन आंदोलनाच्या उल्का महाजन, जन आंदोलनांच्या राष्ट्रीय समन्वयाचे युवराज गटकळ, सत्यशोधक शेतकरी सभेचे किशोर ढमाले, महाराष्ट्र राज्य श्रमिक शेतकरी संघटनेचे विजय कुलकर्णी, महाराष्ट्र वीज ग्राहक संघटनेचे प्रताप होगाडे व प्रभाकर नारकर, समाजवादी किसान सभेचे राहुल गायकवाड व अनिस अहमद, अखिल भारतीय शेतकरी शेतमजदूर संघटनेचे अनिल त्यागी, सगुणा संघटनेच्या शोभा करांडे व मनीषा पाटील आदी उपस्थित होते.