महा-ऊस नोंदणी ॲप शेतकऱ्यांसाठी उपलब्ध

ऊस नोंदणीबाबत शेतकऱ्यांना येणाऱ्या अडचणीची सोडवणूक करण्यासाठी साखर आयुक्तालयाने विकसित केलेले ‘महा-ऊस नोंदणी’ॲप कालपासून शेतकऱ्यांसाठी उपलब्ध झाला आहे. साखर संकुल येथे साखर आयुक्तालयात झालेल्या कार्यक्रमात सहकार मंत्री अतुल सावे यांच्या हस्ते या ॲपचे उद्घाटन करण्यात आले.

मोठी बातमी : परतीचा पाऊस आठवड्यात दाखल होणार !

याप्रसंगी सहकार विभागाचे अपर मुख्य सचिव अनूप कुमार, साखर आयुक्त शेखर गायकवाड, साखर संचालक प्रशासन उत्तम इंदलकर, संचालक अर्थ यशवंत गिरी, साखर आयुक्तालयाचे सहसंचालक पांडुरंग शेळके, मंगेश तिटकारे, राजेश सुरवसे, संतोष पाटील यांच्यासह प्रादेशिक सहसंचालक व श्री नाथ म्हस्कोबा कारखान्याचे शेतकरी व शेती अधिकारी उपस्थित होते.

ऊस नोंदणीबाबत शेतकऱ्यांच्या अडचणी सोडवण्यासाठी ॲप नक्कीच उपयुक्त ठरेल, असा विश्वास व्यक्त करून सहकार मंत्री सावे म्हणाले, हा ‘महा-ऊस नोंदणी’ॲप वापरासाठी अत्यंत सुलभ असून आजपासून गुगल प्ले-स्टोअरवर उपलब्ध करुन देण्यात आले असल्याचे त्यांनी यावेळी जाहीर केले.

महत्त्वाची बातमी : ऊर्जा क्षेत्राला पूरक ठरणाऱ्या कृषी उत्पादनांवर भर द्या : नितिन गडकरी

ऊसाचे क्षेत्र वाढत असताना या ॲपमुळे ऊस नोंदणीबाबत शेतकऱ्यांना होणारा त्रास कमी होईल, असे सांगून सहकारमंत्री सावे म्हणाले, ऊस हे शेतकऱ्यांना आर्थिक लाभ देणारे नगदी पीक आहे. ग्रामीण भागात ऊस नोंदणीबाबत तक्रारी येतात आणि ऊसाची तोड होण्याबाबत शेतकरी चिंतेत असतात. या ॲपच्या माध्यमातून ऊसाची नोंद होणार असल्याने ऊस वेळेवर तुटण्यास मदत होऊन शेतकऱ्यांचा फायदा होईल. यामध्ये एका कारखान्याव्यतिरिक्त अजून दोन कारखान्यांचा पर्याय दाखल करण्याची सोय असल्यामुळे ऊस तोडणीविषयी खात्री मिळेल, असा विश्वास सावे यांनी यावेळी व्यक्त केला.

यावेळी आयुक्त शेखर गायकवाड यांनी ॲपबाबत माहिती दिली. ते म्हणाले, शेतकऱ्यांना साखर कारखान्यात जाऊन ऊस नोंदणी करणे शक्य होत नाही. अशा शेतकऱ्यांना या मोबाईल ॲपमार्फत स्वत:च्या ऊस क्षेत्राची नोंद करता येईल. तसेच ज्या शेतकऱ्यांनी साखर कारखान्यात ऊस क्षेत्र नोंद केली आहे, त्यांच्या नोंदणीची माहिती या ॲपमध्ये दिसून येईल. त्यामुळे शेतकऱ्यांना घरबसल्या आपल्या ऊसाची नोंदणी करणे शक्य होणार आहे, असे त्यांनी सांगितले.

मोठी बातमी : लातूरमध्ये सोयाबीन उत्पादक शेतकऱ्यांची 85 लाखाची फसवणूक

असे आहे ‘महा-ऊस नोंदणी’ ॲप

‘महा-ऊस नोंदणी’ॲप वापरासाठी अत्यंत सुलभ असून आजपासून गुगल प्ले-स्टोअरवर उपलब्ध करुन देण्यात आले आहे. शेतकऱ्यांनी ते डाऊनलोड करुन त्यावरुन आपल्या चालू हंगामातील ऊस क्षेत्राची माहिती भरावी लागेल.

ॲपमध्ये ऊस लागवडीची जिल्हा, तालुका, गाव व गट नंबरनिहाय माहिती भरल्यावर इतर माहितीसह ऊस क्षेत्राची माहिती भरावी. त्यानंतर कोणत्या कारखान्याला या ऊस नोंदणीसाठी कळवायचे यासाठी कारखान्यांचे तीन पर्याय भरता येतील. आयुक्तालय ही माहिती संबंधित जवळच्या कारखान्याकडे पाठवून देईल. त्यानंतर शेतकऱ्याला साखर कारखान्यामधील आपली ऊस नोंदणीची माहिती पाहता येईल, या ॲपच्या माध्यमातून साखर आयुक्तालय राज्यातील 100 सहकारी व 100 खासगी असे एकूण 200 कारखान्यांकडे ऊस नोंदणीची माहिती पाठवू शकेल.