कणेरी मठ येथे सोमवारपासून पंचमहाभूत लोकोत्सव !

कणेरी मठ (कोल्हापूर) येथील श्री क्षेत्र सिद्धगिरी महासंस्थानच्या वतीने दिनांक 20 ते 26 फेब्रुवारी 2023 या कालावधीत सुमंगलम् पंचमहाभूत लोकोत्सवाचे आयोजन करण्यात आले असून, जागतिक स्तरावर वातावरणीय बदलामुळे निर्माण होणाऱ्या अनेक समस्यांची माहिती आणि पर्यावरण संरक्षणाच्या जबाबदारीची जाणीव सर्वसामान्य लोकांना व्हावी, या उद्देशाने या लोकोत्सवाचे आयोजन करण्यात आले आहे.

ब्रेकिंग : स्वाभिमानीचे 22 पासून राज्यभर चक्का जाम !

दरम्यान, लोकोत्सवांतर्गत उभारण्यात आलेल्या विविध दालनांना मुख्यमंत्री एकनाथ शिंदे यांनी भेट देवून कार्यक्रमाच्या तयारीची माहिती घेतली. यावेळी बोलताना मुख्यमंत्री शिंदे म्हणाले की, सध्या जागतिक तापमान वाढ आणि बदलत्या हवामानामुळे होणाऱ्या दुष्परिणामांना आपल्याला सामोरे जावे लागत आहे. त्याचबरोबर जल, वायू, ध्वनी प्रदूषणाचे गंभीर परिणाम होत आहेत. पंचमहाभूतांच्या संरक्षणाबद्दल जनजागृती करणे अत्यंत आवश्यक असल्याचे त्यांनी यावेळी सांगितले.

पर्यावरण पूरक असलेली सेंद्रिय शेती खूप उपयुक्त असल्याचे सांगून, मुख्यमंत्री शिंदे म्हणाले, राज्य शासन ही सेंद्रिय शेतीसाठी प्राधान्य देत आहे. सेंद्रिय शेतीचे उत्पादन घेणाऱ्या बचत गटांना त्यांच्या मालाची विक्री करण्यासाठी जिल्हा स्तरावर बाजारपेठ उपलब्ध करून देत आहे. सेंद्रिय शेतीमुळे शेती पिकांच्या उत्पादकतेत मोठ्या प्रमाणात वाढ होत असल्याचे त्यांनी यावेळी सांगितले.

मोठी बातमी : कलिंगडाच्या दरात मोठी घसरण

कृषी विज्ञान केंद्राच्यावतीने कणेरी मठावर घेण्यात येत असलेल्या सेंद्रिय शेती पिकांची मुख्यमंत्री शिंदे यांनी पाहणी केली. या महोत्सव कालावधीत येथे येणाऱ्या प्रत्येक नागरिकांनी विशेषत: शेतकरी बांधवांनी येथील सेंद्रिय शेतीला भेट देऊन या पद्धतीची शेती आपण स्वतः करण्याबाबतचा निश्चय करावा, असे आवाहन त्यांनी यावेळी केले. तसेच सेंद्रिय शेती करणाऱ्या शेतकऱ्यांना शासन सर्वतोपरी मदत करेल, अशी ग्वाही ही मुख्यमंत्री शिंदे यांनी यावेळी दिली.

यावेळी श्री काडसिद्धेश्वर स्वामीजी, पालकमंत्री दीपक केसरकर, राज्य नियोजन मंडळाचे कार्यकारी अध्यक्ष राजेश क्षीरसागर, आमदार प्रकाश आबिटकर, खासदार संजय मंडलिक, विभागीय आयुक्त सौरभ राव, कोल्हापूर परिक्षेत्राचे पोलीस महानिरीक्षक सुनील फुलारी, जिल्हाधिकारी राहुल रेखावार, कोल्हापूर महानगरपालिका आयुक्त डॉ. कादंबरी बलकवडे, जिल्हा परिषदेचे मुख्य कार्यकारी अधिकारी संजयसिंह चव्हाण, पोलीस अधीक्षक शैलेश बलकवडे, माजी आमदार अमल महाडिक, मठाचे विश्वस्त उदय सावंत, संतोष पाटील आदी उपस्थित होते.