राज्य सरकारने 8 हजार कोटी रुपये विमा कंपन्यांच्या घशात घातले : फडणवीसांचा आरोप

शेतकरी विम्याचे पैसे भरतो पण, त्याला पीकविमा मिळत नाही. या सरकारने 8 हजार कोटी रुपये विमा कंपन्यांच्या घशात घातल्याचा आरोप विरोधी पक्षनेते देवेंद्र फडणवीस यांनी टेंभुर्णी येथे आज शेतकर्‍यांच्या मेळाव्यात बोलताना केला.

रयत क्रांती संघटनेचे प्रमुख आणि माजी मंत्री सदाभाऊ खोत यांच्या ‘जागर शेतकर्‍यांचा-आक्रोश महाराष्ट्राचा’ या यात्रेच्या समारोप टेंभुर्णीत पार पडला. यावेळी विरोधी पक्षनेते देवेंद्र फडणवीस यांनी राज्य सरकारवर जोरदार टीका केली.

ब्रेकिंग न्यूज : पेट्रोल 9.50 तर डिझेल 7 रुपयांनी स्वस्त

या कार्यक्रमात शेतकर्‍यांच्या मेळाव्यात फडणवीस बोलत होते. यावेळी विधानपरिषदेतील विरोधी पक्षनेते प्रवीण दरेकर, माजी मंत्री सदाभाऊ खोत, हर्षवर्धन पाटील, खासदार रणजितसिंह नाईक निंबाळकर, आमदार गोपीचंद पडळकर, माजी मंत्री सुभाष देशमुख, आमदार विजयराव देशमुख उपस्थित होते.

या सरकारमध्ये कोणीतरी शेतकर्‍यांबद्दल बोलताना तुम्ही पाहिले आहे का असा सवाल करून फडणवीस म्हणाले, ‘पिकेल ते विकेल’ अशी घोषणा करायची आणि प्रत्यक्षात ‘पिकेल ते जळेल’ असे धोरण राबवले जात आहे. महाविकास आघाडीसमोर जे प्रश्न आहेत, ते बारमालकांचे, विदेशी दारुचे दर कमी करण्याचे. शेतकर्‍यांच्या प्रश्नांशी त्यांना काही लेनदेन नसल्याची जोरदार टीका त्यांनी यावेळी केली.

आनंदाची बातमी : तीन वर्षात साखर निर्यातीमध्ये १५ पट वाढ

आपत्तीत सरकारने शेतकऱ्यांना मदत केली नसल्याचे सांगून फडणवीस पुढे म्हणाले, 10 हजार कोटींचे पॅकेज जाहीर केले आणि 3000 कोटी पण दिले नाहीत. निर्णयानंतर वर्षभर यांचे जीआर निघत नाहीत. जीआर असे काढतात की, शेतकर्‍यांसाठी अडथळ्यांची शर्यत तयार होते. वादळ, गारपीट, अतिवृष्टी अशा कितीतरी आपत्ती येऊन गेल्या. पण, कवडीची मदत या सरकारने केली नसल्याचे फडणवीस म्हणाले. पंतप्रधान नरेंद्र मोदी यांनी स्वामिनाथन आयोग लागू केला आणि शेतकर्‍यांना वाढीव हमीभाव दिला. 10 वर्ष काँग्रेसने हा अहवाल थंडबस्त्यात ठेवला. आज शेतकर्‍यांना मोठ्या प्रमाणात निधी केंद्र सरकारतर्फे दिला जातो. 1.75 लाख कोटी रुपये सन्मान निधी योजनेच्या माध्यमातून शेतकऱ्यांना दिला असल्याचे त्यंनी यावेळी सांगितले.

`अतिमहत्वाची बातमी :` सोयाबीनच्या नव्या या सहा वाणांचे संशोधन

महाविकास आघाडीने सार्‍याच योजना बंद केल्या असल्याचा आरोप करून फडणवीस म्हणाले, आमच्या सरकारने शेततळ्यांची योजना राबवली. गटशेतीची योजना तयार केली. यांत्रिकीकरणासाठी मदत दिली. मात्र महाविकास आघाडीने सार्‍याच योजना बंद केल्या. हे सरकार जुन्या काळातील टेलिफोनसारखे आहे. 1 रुपया टाकला तरच हॅलो ऐकू येते, असेही फडणवीस म्हणाले. मुख्यमंत्र्यांनी घोषणा केली, ‘माझं कुटुंब-माझी जबाबदारी’, तेव्हापासून सर्वच मंत्र्यांचा एकच कार्यक्रम सुरू आहे, ‘माझं कुटुंब-माझी जबाबदारी’! या सरकारने शेतकर्‍यांची दैना केल्याचे फडणवीस म्हणाले.

आता उजनीचे पाणी वळवण्याचे कारस्थान रचले जात असल्याचे सांगून फडणवीस म्हणाले, कितीही पोटात गेले तरी काही लोकांची तहानच भागत नाही. सामंतशाही आणण्याचे काम काही नेते करत असल्याचे ते म्हणाले. हा फक्त यात्रेचा समारोप आहे. आंदोलनाचा समारोप नाही. तर शेतकर्‍यांना जोवर न्याय मिळत नाही, तोवर आपला लढा, संघर्ष असाच सुरु राहील असेही फडणवीस यावेळी म्हणाले.